Me konferencën për media të mbajtur sot është hapur edhe zyrtarisht Java Olimpike 2022, në të cilën do të organizohen aktivitete të shumta.
Java Olimpike mbahet prej 13 deri më 17 qershor. Në ditën e fundit, të premten është paraparë të organizohen aktivitete në 26 komuna, ku të njëjtën ditë shënohet Dita Olimpike.
Presidenti i KOK-ut, Ismet Krasniqi, ka folur për aktivitetet që do të organizohen, derisa ka bërë thirrje që sa më shumë fëmijë të bashkohen në aktivitete, në mënyrë që bashkërisht t’i promovojmë vlerat olimpike dhe njëkohësisht të ndikojmë në masivizimin e sportit në Kosovë.
Sekretari i përgjithshëm, Besim Aliti, theksoi se këtë herë Java Olimpike organizohet më herët, për shkak të udhëtimit javën e ardhshme të ekipit mesdhetar të Kosovës në Lojërat Mesdhetare Oran 2022.
Kryetari i grupit punues, Halil Sylejmani, dha detaje për shënimin e Ditës Olimpike, që do të mbahet të premten në 26 komuna.
Aktiviteti kryesor mbahet në stadiumin “Fadil Vokrri”, ku bashkëpjesëarrëse është edhe Komuna e Prishtinës. Për këtë foli udhëheqësi i Departamentit të Sportit, Hizdri Bunjaku.
Në organizimin e aktiviteteve ka ndihmuar edhe Federata e Sportit Shkollor, ku e pranishme në konferencë ishte edhe nënkryetarja e kësaj federate, Lejla Boshnjak.
