Komiteti Olimpik i Kosovës ka mbajtur sonte Asamblenë e Punës për vitin 2020. Krahas asambleistëve, i pranishëm ishte edhe ministri i ri për Kulturë, Rini e Sport, Hajrullah Çeku.
Në fjalën e tij, presidenti Besim Hasani, foli për punën e bërë gjatë vitit 2020 dhe në Ciklin Olimpik 2017-2020.
Presidenti Hasani përmendi nëntë medaljet e fituara, tetë nga xhudo dhe një nga atletika, të fituara në garat e organizuara nga Komiteti Olimpik Ndërkombëtar, Komiteti Olimpik i Evropës dhe Lojërat Komiteti Ndërkombëtar i Lojërave Mesdehtare, si dhe sukseset e sporteve ekipore.
Presidenti u ndje krenarë me punën e bërë në bashkëpunim me Bordin Ekzekutiv, duke veçuar edhe aktivitetet e Edukimit Olimpik si Festivalin Olimpik Dimëror PyeongChang 2018, ku performuan mbi 12 mijë fëmijë, Festivalin për Parashkollorët Prishtina 2018, projektin unik për Ditën Olimpike, të cilës tashmë i janë bashkuar mbi 12 mijë fëmijë të lindur në vitin e Pavarësisë së Kosovës.
Asambleistëve iu drejtua edhe ministri Çeku, i cili lartësoi suksesin e sportistëve tanë, duke thënë se sporti nuk do të jetë prioritet vetëm i Ministrisë për Kulturë për Rini e Sport, por i gjithë Qeverisë së Kosovës.
Më pas, Asambleja nisi punën me miratimin e Rendit të Ditës.
Unanimisht u miratua procesverbali i Asamblesë së Punës 2019. Dy federata të reja, ajo e Skermës dhe Tekballit u bënë anëtare me të drejta të plota.
Unanimisht u miratua Raporti i Punës 2020. Me një votë abstenim u miratua Raporti Financiar 2020, kurse unanimisht u miratuan Raporti i Auditimit 2020, Raporti Financiar 2020, Raporti i Këshillit Mbikëqyrës dhe Plani i Veprimit 2021.
