Konsorciumi i projektit “SAFE HARBOUR” u mblodh këtë javë në Bukuresht të Rumanisë për takimin e dytë të projektit, duke reflektuar përkushtimin e vazhdueshëm për forcimin e masave të mbrojtjes në sportin evropian. Takimi dyditor, i organizuar nga Komiteti Olimpik dhe Sportiv i Rumanisë, bashkoi partnerë nga mbarë Evropa për të vlerësuar progresin e arritur dhe për të përcaktuar hapat e ardhshëm.
Komitetin Olimpik të Kosovës në këtë takim e përfaqësoi Marigona Mehmeti, e cila kontribuoi në diskutimet mbi zhvillimin e mëtejshëm të politikave për mbrojtjen dhe sigurinë në sport, në përputhje me objektivat e projektit “SAFE HARBOUR”.
Dita e parë përfshiu sesione interaktive dhe prezantime mbi rezultatet kryesore të deritanishme, duke përfshirë raportin GAP, hartën e palëve të interesuara dhe klasifikimin e shqetësimeve lidhur me mbrojtjen në sport. Kontributet e ekspertëve nga Universiteti Thomas More, Komiteti Olimpik Ndërkombëtar (IOC) dhe Zyra e BE-së e EOC-së nxitën diskutime produktive për avancimin e mbledhjes së të dhënave dhe përmirësimin e kuptimit të situatës aktuale.
Dita e dytë prezantoi Kornizën Evropiane të Reagimit dhe aktivitetet parapërgatitore për krijimin e Rrjetit Evropian për Sport të Sigurt. Gjatë takimit u diskutuan edhe aspektet praktike të bashkëpunimit dhe angazhimit në kuadër të aktiviteteve të ardhshme të projektit “SAFE HARBOUR”, përfshirë Konferencën Evropiane që do të mbahet në mars 2026 dhe takimin e radhës të konsorciumit në Frankfurt, në qershor 2026.
Përveç punimeve zyrtare, pjesëmarrësit patën edhe momente shoqërore, duke forcuar përkushtimin e përbashkët që projekti të shndërrohet në një lëvizje që bashkon aktorët kryesorë për të vendosur themelet e Qendrës Rajonale të Mbrojtjes së IOC-ut në Evropë, një qendër e zhvilluar nga rajoni, për rajonin.
