Presidenti i Komitetit Olimpik të Kosovës, Ismet Krasniqi, i shoqëruar nga sekretari i përgjithshëm, Besim Aliti, ka pritur sot presidentin e Federatës Ndërkombëtare të Arteve Mikse Marciale (IMMAF), Kerrith Brown.

Presidenti Brown ndodhet në Kosovë per turneun ndërkombëtar të MMA "Kosova Fighting Series 2", që u mbajt mbrëmë në Prishtinë.

Presidenti Krasniqi duke i uruar mirëseardhje në Kosovë, e njohu presidentin Brown me sfidat dhe sukseset e sportistëve tanë, derisa i shprehu vullnetin dhe gatishmërinë për të bashkëpunuar ngushtë me IMMAF për zhvillimin dhe avancimin e sportit të arteve mikse marciale në Kosovë.

Nga ana e tij, Brown, falënderoi presidentin Krasniqi për mikpritjen dhe përkushtimin ndaj sportit, me theks të veçantë bashkëpunimin e mirë me Federatën e Arteve Marciale të Kosovës.

Brown gjatë karrierës së tij ka qenë xhudist, ku në Lojërat Olimpike Los Angjelos 1984 kishte fituar medaljen e bronztë.

Tema e xhudos dhe tri medaljet tona të arta olimpike nga ky sport ishin padyshim temë diskutimi.

I pranishëm në takim ishte edhe anëtari i Këshillit të Arbitrazhit të Kosovës (KAS), Visar Alimehaj.