Kosova nuk do të pres medalje vetëm nga xhudoja në Kampionatin Olimpik Evropian për të rinj (EYOF), “Gyor 2017”, që mbahet në Hungari prej 23-29 korrik 2017.

Është atletika që beson se kanë kapacitet për të t’u ngjitur në podium.
Trajneri i tyre, Xhavit Tahiri, beson se ndonjëri nga garuesit e tij do të hyjnë në zonën e medaljeve.
Ai po i përgatit garuesit e tij në qëndrën sportive “Gloria Sports Center” në Belek të Turqisë, ku u dërguan nga Komiteti Olimpik i Kosovës.
“Kemi atletë mjaft cilësorë, duke filluar nga Gentiana Peci, që garon në 3000 metra, Arian Smajli është atlet i ri dhe me të ardhme, prandaj presim të hyjmë në zonën e medaljeve. Alaudin Suma premton shumë në hedhjen e diskut, është më i miri në Kosovë. E kemi edhe Valentina Kelmendin, e cila për grupmoshën e saj është mjaftë e mirë. Unë shpresoj se do të kthehemi me ndonjë medalje”, tregon optimizmin e tij, Tahiri.
Optimiste e madhe tregohet edhe sportistja, Gentiana Peci. “Jemi duke u përgatitur maksimalisht dhe presim që ne atletët të sjellim medalje, për çka do të ishte kënaqësi e madhe. Atletika ka kapacitet për të fituar medalje”, thekson ajo.
Për rezultate të mira udhëtojnë edhe Alaudin Suma, Arian Smajli dhe Valentina Kelmendi, të cilët janë të vetëdijshëm për konkurrencën e fortë, por me përgatitje të mira besojnë se do të kenë përfaqësim dinjitoz.
“Jemi të gatshëm për të sjell medalje”, ndërhyn Suma, që garon në hedhjen e diskut. Smajli garon në disiplinën 3 000 metra, kurse Kelmendi në 800 metra.
Atletika përfaqëson Kosovën me katër sportistë, aq sa ka edhe xhudoja dhe noti, kurse tenisi me dy.